Wider uf dr strooss

Hoi zämme

So, nachdäm wider e zitli ume isch, sit i gschribe ha, isch au wider e chlli öbis passiert....
Mitem Chef und siner Familie hämer no zimli gueti feschter gfiirt....Zum bispil simer am mentig, das isch die letscht wuche bevor mr z bielefeld wider abgreist sind, ans Füürwehrfescht....was ziiiiimli bgange isch....dr armin isch au drbii gsi, e steimetz wo bi uns reist....zimli cool gsi, mir hätte am zischtig erscht am 10 am morge miesste ahfo....aber dr chef het im taxi denn plötzlich gmeint, mir miesse morn nit schaffe :-D isch uns natürlich mee als gläge cho...do jo, womer mitem taxi hei sind, scho öbe 5i am morge gsi isch !!!!

Naja, als ob das mit feschte für ei wuche nit gnue gsi wär, händ dr andi (chef) und d dani (fründin vom chef) e abschidsparty gschmisse für uns...nur für uns, aso für die 2 monet womer döt gsi sind ;-) richtig tolli mensche sag i euch...es sind beschtimmt 15 bi 20 nase döt gsi über dr ganz obe verteilt, vo fründe vo dene beidne über schweschtere vo uns wo uf bude (fridrichshöchi) schaffe...bis lüt womer kenne glert händ an de partys und natürlich mitarbeiter....e riiiiiise sach sag i euch....dr andi und d dani händ uns no e chlises gschänkli gmacht....neui socke, stift zahnbaschta und so chlises züg, was uns halt total vill bringt wemer unterwägs sind !!!!
Dr dome und ich händ ihne au no e chlises abschidsgschänkli zämmegschueschteret....
Mir händ e rote bilderrahme kauft ;-) natürlich rot, was au suscht ;-) und händ so e chlini foticollage gmacht....seht richtig cool us das ding und es hängt bi dene beidne direkt in dr chuchi weme ihne chunnt....d dani het sogar miesse ei zwei dräänli verdrugge wo mr ihne das gschänkt hän....mir sind ihne döt sehr ans härz gwachse und si uns au !!!!!!!!

Und, immernoni gnueg gfeschtet....mir drei, dr armin, dr dome und ich...händ so zimmli s ganz wucheend no dure gfeschtet unds luschtig kah !!!! Am mentig denn het uns d dani an d autobahnuffahrt do damit mr guet wäg chömme...naja, alli no chli alkoholisiert het das natürlich nit so klappt wie mr uns erhofft händ und mir sind grad mol 50 km witer cho, uf guet dütsch, NüT.... bis nach salzkotten das isch in dr nöchi vo Paderborn simer cho und händ döt imene alte pferdestall übernachtet...mit flüssli näb dra, was iischalt isch gsi aber richtig cool am morge frie, aso am zähni dr z gumpe :-D

unser Ziel isch jo eigentlig gsi nach Creglingen, unterhalb vo würzburg z cho, um e neui kluft ahmässe z loh !!! Was denn au eigentlig ganz guet klappt het am negschte daag....mir sind denn am öbe zähni zobe in ohrebach ahcho, das isch e raschtstedt und e ort wo au so heisst, grad näb dra...döt simer denn hi glofe und händ welle e kneipe sueche...chuum im ort, simer uf e jäger troffe womer denn nachere kneipe gfrogt hän...er het gmeint es git eini und die sig nit wit °!!! sini frau wo denn drzue cho isch het gmeint die het mentig und zischtig zue und mir gradmol total ahkackt gsi....denn, es het pisst !! Naja, gscheech nüt schlimmers, die beide händ uns drei churzerhand zu sich hei iiglade, ihre sohn sig grad nit do, chönnet bi ihm im zimmer penne, händ si gmeint und das ahgebot hämer natürlich nit chönne usschlooh....nacheme znachtässe und 3 bier wos no geh het, simer denn schön i pennt und am negschte morge hets am achti oder so, grad wider zmorge geh, was uns natürlich sehr gläge cho isch...
Dr jäger het uns denn am gliiche morge no direkt uf creglinge gfahre, direkt vore Kluftschniider....und öbbe 2,5 stund spöter simer alli drei wider use gloffe...jedoch bis jetzt öbe 800 euro lichter....(ahzahlig für d kluft, obwohl villicht no chli öbis drzue chunnt) das heisst, ganzi lohn wäg, kei gäld meh.......egal, schlimm isch das nit, öbbe 100 het jede no kah und nach langem bei in buuch stoh und trampe simer denn in Bad mergentheim ahcho, wo denn spöter au unser nachtlager gsi isch und das binere bar unter em vordach (www.frankies-badmergentheim.de).

Dr negscht daag het wider was trampe ahgoht nit sehr vill brocht...wiedr öbe nur 50 km nach würzburg in d stadt ine.... ABER.....würzburg isch e richtig schöni stadt....vodämhär het sich das für uns gloohnt !!! scho numme zum luege und chli dur d stadt z schländere !!!
In Würzburg simer denn ins spital go übernachte...hän döt e zimmerli becho womer uns hän chönne breit mache um am negschte morge, frie wär übertribe,richtig hamburg z mache, was am ahfang üüüüüberhaupt nit klappt het, total verschisse isches glofe zerscht, bises iigrisse het.....................paar stund spöter und 430 km witer, simer denn am gliiche obe no in hamburg ahcho....mied und gschaffe vom ville labere mit all dene wo di mitgnoh händ, simer bi dr brigitte (isch so s mami vo allne wandersgselle, si läb so chli für unsre schacht, vorallem für unsre) in ihrere Eckkneipe in St. Pauli ahcho (St.Pauli Eck) döt es paar Bierli in chopf gstellt und ab zur brigitte hei, wo si e zimmer iigrichtet het nur für wandersgselle, go schlofe...und so het d wuche in hamburg ahgfange :-D

Jojo lüt, ob drs glaubet, e wuche hamburg isch ächt vill und macht verdammt mied, Reeperbahn uf, Reeperbahn ab, Davidstrooss uf, davidstrooss ab und die gaaaaanz zit wirsch vo de nutte vollglaberet, es isch niiiit zum glaube... Dialog:

Nutte: Hallo, stop mal
David Stopt
David: Ja was denn ;-)
Nutte: hast du nicht 30 euro übrig ??? Zwinker zwinker
David: Hallo, ich bin wandersgeselle, wir haben grundsätzlich kein geld...
Nutte: Ich weiss ganz genau wo ihr euer geld habt (und si wissen es wirklich)
David: Ja schön und gut, aber ich hab keins, hab alles versoffen und verfressen
Stimmt natürlich nur ahsatzwiis...

Das chönnt öbe so e dialog si wiener uf dr davidstrooss zwüsche nutte und uns stadtfinde chönnt !!! Naja, mir frogr denn meischtens no chli woher si denn sige und pläuderle chli mitene...die meischte mache das allerdings nit so lang mit und haue gli wider ab wenn si merke das de nit mitene mit gohsch !! aber die eint oder die ander lot ganz guet mit sich schwätze....:-D
Chönnet jetzt dänke was dr wänd, aber mir händ immer nur mitene gschwätzt, nüt anders, aber schlussändlig muessi mi jo vor niemertem rächtfertige :-D hahaha freu !!!!!!!

Jo wie scho oft erwähnt isch denn am sunntig s mami und dr papi uf hamburg cho.....ah jo natürlich, mi unkle und si frau au no, hehe, fascht vergässe, sorryyy ;-)
Mir händ alli zämme oft öbis unternoh, was für uns ganz cool gsi isch, so hämer au ´mol öbis anders vo hamburg gseh als d reeperbahn, wo sowiso ufe sack goht mit dr zit !! und do jo mi papi sich reltiv guet uskennt in hamburg und die stadt liebt, naja, mir mitlerwiile au, isch das e richtig cooli wuche gsi....em dome sini eltere sind au no für ei daag cho und das het ihm glaub au ganz guet do, uf jedefall isches coo, gsi !!!!

Jo und jetzt hock i in St. pauli im internetkaffi und schrib in blog....dus isch e riise lärm wüll st. pauli grad es spiil kah het und mir reise morn wider ab in richtig erfurt um dr roberto z bsueche, de het jo z ibiza gschafft und chunnt am 4 september wider hei, aso zur fründin uf dütschland !!!
Drnooch hämer abem 10 september eigentlich arbet in eutin, was i jo scho verzellt ha, aber an mim geburtsdaag, wie glaub au scho erwähnt, simer wider churz s wucheend in ´bielefeld anere iiheimischmäldig, und denn erscht nacherd in eutin obe....

Das mit silvester in arosa stoht glaub....es paar vom dome siner gugge sind au dobe, i glaub das wird ganz luschtig und freu mi riisig uf d schwiz...wie gseit wärde mr denn glaub e zilt in dr schwiz umereise und i glaub denn ergit sich ganz bestimmt e möglichkeit sich im perosa oder so z träffe :-D hahaha, wie geil wär das denn !!! ;-) (oder suscht nöime)

So liebi lüt, das widermol was so gloffe isch bi mir, i hoff euch wirds nit langwilig dehei und dir händs alli guet !!!!
I wünsch euch allne nur s bescht uf dr wält und bis bald mol...i mäld mi wider, bi ab und zue au uf FZ online und es freut mi immer vo euch z köre, machets guet, eure viddli